مسودة، آخر تحديث 17 تشرين الثاني 2026
شروط الاستخدام
هاي الشروط تمشي لما تستخدم مسك Misk. هي مسودة لأن التطبيق بعده بالتجربة، وراح نحدّثها قبل ما ينزل للكل.
شنو هو مسك
مسك يوصلك بمخابز ببغداد تطلب منها كيك ومعجنات وخبز وحلويات، وتصمّم كيكة على كيفك. مسك مو هو اللي يخبز ويبيع: كل مخبز بائع مستقل، وهو المسؤول عن الأكل اللي يسويه، طعمه ونظافته ومكوناته، وعن التوصيل إذا هو يوصّل. بعض المخابز توصّل وبعضها استلام بس.
التصميم والسعر
- الصورة اللي يرسمها المساعد رسمة تقريبية حتى يفهم الخباز فكرتك. الكيكة تطلع قريبة منها، مو نفسها بالضبط.
- قبل ما يأكد المخبز تشوف سعر تقريبي بس. السعر اللي تدفعه هو اللي يثبّته المخبز وتوافق عليه.
- أجرة التوصيل يحددها المخبز وتبيّن قبل ما تأكد.
الدفع والإلغاء
الدفع كاش عند الاستلام. قبل ما يأكد المخبز طلبك تكدر تلغيه بدون أي شي. بعد التأكيد، الكيكة تنسوى مخصوص إلك، فالإلغاء يصير بالاتفاق ويا المخبز. راسلنا إذا صارت مشكلة ونحاول نحلها وياكم.
شنو ما ينقبل بالتصاميم
نرفض أي تصميم بيه تعري أو محتوى جنسي، أو أي شي مخالف للقانون. لما نفعّل رفع الصور، الصور اللي ترفعها لازم تكون إلك أو عندك حق تستخدمها، وتسمحلنا وللمخبز نستخدمها بس حتى نسوي طلبك.
حسابك
حافظ على إيميلك لأن الدخول يصير برمز يوصله. إذا شفنا إساءة، مثل طلبات وهمية أو تحايل على المخابز، نكدر نوقف الحساب.
للمخابز
المخابز عدها شروط خاصة (العمولة والدفعات والحسابات) تنعرض بلغة واضحة قبل ما المخبز ينضم. التسجيل بهذا الموقع اهتمام بس، مو عقد.
الخدمة بعدها بالتجربة
نشتغل حتى تبقى الخدمة شغّالة، بس هي بالتجربة وممكن تتوقف لو تتغير. إذا غيرنا هاي الشروط، نحدّث التاريخ فوگ.