مسودة، آخر تحديث 17 تشرين الثاني 2026
سياسة الخصوصية
هاي الصفحة تشرح شنو المعلومات اللي ياخذها مسك Misk، ليش ياخذها، ويا منو يشاركها، وشلون تطلب تمسحها. هي مسودة لأن التطبيق بعده بالتجربة، وراح نحدّثها قبل ما ينزل للكل.
شنو ناخذ
- الحساب: إيميلك حتى تسجّل دخول برمز يوصلك عليه. تسجيل الدخول بحساب Google وApple جاي قريباً، ووقتها ناخذ منهم اسمك وإيميلك بس.
- الطلبات: اسمك ورقم موبايلك وعنوان التوصيل، وشنو طلبت، وملاحظاتك للمخبز.
- التصاميم: اللي تكتبه للمساعد، والاختيارات اللي تسويها، والصور اللي تطلع من التصميم.
- المناسبات: إذا ضفت مناسبة: اسمها وتاريخها وصلة القرابة وإعدادات التذكير.
- استمارة المخابز بهذا الموقع: الاسم واسم المخبز والمنطقة ورقم الموبايل لو حساب الإنستغرام.
- معلومات تقنية: عنوان الـIP وسجلات الخادم، نستخدمها للحماية ولمنع الإساءة، مثل تحديد عدد المحاولات.
ليش ناخذها
حتى نوصل طلبك للمخبز وتوصلك، وحتى نذكّرك بمناسباتك إذا طلبت هذا، وحتى نتواصل ويا المخابز اللي سجّلت اهتمامها، وحتى نحمي الخدمة. ما نبيع معلوماتك لأي أحد، وما نستخدمها لإعلانات تتبعك.
صور الكيك بالذكاء الاصطناعي
لما تصمّم كيكة بالمساعد، الكلام اللي تكتبه ينرسل لشركة OpenAI حتى ترسم الصورة وحتى تفحص المحتوى. الصورة اللي تطلع رسمة تقريبية للخباز، مو وعد بشكل الكيكة بالضبط.
رفع صورك بالتصميم بعده مو شغّال. لما نفعّل رفع الصور:
- الصور اللي ترفعها تنرسل لـOpenAI بنفس الطريقة، للرسم وفحص المحتوى.
- تبقى خاصة: تشوفها إنت، والمخبز اللي تدزله الطلب يشوفها.
- نمسحها بعد 30 يوم من آخر تعديل على التصميم، أو بعد 30 يوم من الطلب إذا طلبته.
- ما نستخدمها لتدريب أي نموذج، ولا بالإعلانات أو التسويق.
المخابز
المخابز بمسك بائعين مستقلين، مو موظفين عدنا. لما تطلب، نعطي المخبز اللي يحتاجه حتى يسوي طلبك ويوصله: اسمك ورقمك وعنوانك والتصميم وملاحظاتك. الدفع كاش عند الاستلام.
تذكير المناسبات بالإيميل
التذكير اختياري. بعد ما تشغّله يوصلك إيميل تأكيد، وما نبعث أي تذكير قبل ما تضغط رابط التأكيد. بكل إيميل تذكير اكو رابط تلغي بيه الاشتراك.
منو يساعدنا نشغّل الخدمة
- Cloudflare: تبعث الإيميلات، والموقع يمر من خلالها (CDN وحماية).
- OpenAI: رسم صور الكيك وفحص المحتوى، مثل ما مكتوب فوگ.
- Google وApple: تسجيل الدخول، من يصير متوفر.
معلومات الحسابات والطلبات محفوظة على خوادمنا.
هذا الموقع
الموقع ما بيه إعلانات ولا أدوات تتبع، وما يحمّل أي شي من مواقع ثانية. الكوكي الوحيد يحفظ اللغة اللي اخترتها.
حقوقك
تكدر تطلب نسخة من معلوماتك، أو تصحّحها، أو تمسح حسابك ومعلوماته. راسلنا ونسويها، إلا الشي اللي لازم يبقى حتى يكمل طلب بعده شغّال.
للتواصل
أي سؤال عن خصوصيتك: [email protected]